Рейтинг:  0 / 5

Шу кунларда Жиззах ва Олмалиқ шаҳарларида футзал бўйича XXIII Ўзбекистон чемпионатининг 11-тур ўйинлари ўтказилмоқда.

Жиззах шаҳрида бўлиб ўтаётган баҳсларда Хуршид Тожибоев ва Аҳад Ҳошимов мураббийлик қилаётган “Навбаҳор” футзал жамоаси ҳам иштирок этмоқда.

Футзалчиларимиз 11-тур доирасидаги илк баҳсни Тошкентнинг “Локомотив” жамоасига қарши ўтказиб, 5:3 ҳисобида ғалаба қозонишди.

Хуршид Тожибоев шогирдлари ушбу тур доирасидаги иккинчи ўйинда Бекободнинг “Металлург” жамоаси билан куч синашиб, 5:6 ҳисобида мағлубиятга учрашди.

Футзалчиларимиз 11-турнинг сўнгги баҳсини бугун Тошкентнинг “Пахтакор” жамоасига қарши ўтказишади.

Бўлажак баҳсда Хуршид Тожибоев шогирдларига омад ёр бўлишини тилаймиз.

“Навбаҳор” ПФК матбуот хизмати.     

Рейтинг:  0 / 5

Жорий мавсумнинг Наманган вилоят биринчилиги икки минтақа, яъни “А” ва “В” минтақасига бўлинган ҳолда ўтказилди.

“А” минтақасида Уйчининг “Пахтакор - 79” ва Косонсойнинг “Косонсой”, “В” минтақасида эса “Навбаҳор” – U-21 ёшлар ҳамда Чустнинг “Чуст” жамоалари 1 ва 2-ўринларни банд этишганди.

Шу ҳафтадан мазкур жамоалар ўртасида “плей-офф” босқичида вилоят чемпионлиги учун ўйинлар бошланди.

18 ноябрь куни ўтказилган дастлабки баҳсда Уйчининг “Пахтакор-79” ва Чустнинг “Чуст” жамоалари ўзаро баҳс юритишди. Ушбу учрашувда уйчиликлар 2:0 ҳисобида ғалаба қозониб, финалда тўп суриш ҳуқуқини қўлга киритишди.

Иккинчи ўйинда эса Анвар Ҳафизов ҳамда Денис Тойменцов қўл остидаги  “Навбаҳор U-21” ёшлар ва “Косонсой” жамоалари майдонга тушишди.

Кескин ҳамда муросасиз руҳда ўтган мазкур ўйинда ёш “лочинлар” 5:2 ҳисобида ғалаба қозонишди.

Ушбу баҳсда Анвар Ҳафизов шогирдларидан Муҳаммад Аҳадов ва Аюбхон Жўраев “дубл”га эришишди. Наманганликларнинг яна бир голи эса Музаффар Олимжонов ҳисобига ёзилди.

Косонсойликлардан эса голларга Ислом Абдуқодиров ҳамда Шоҳруҳ Раззоқов муаллифлик қилишди.

Таъкидлаш жоизки, биринчи бўлимдан сўнг, мазкур ўйинда 3:2 ҳисоби қайд этилаётганди.

Иккинчи бўлимда ҳужумкорликни кучайтирган ёш “навбаҳорчилар” яна 2та гол уриб, якуний ҳисобнинг йирик кўрниниш олишини таъминлашди.

Шу тариқа вилоят чемпионлиги учун “Навбаҳор” – U-21 ва “Пахтакор - 79” жамоалари ўзаро куч синашадиган бўлишди.

Ҳал қилувчи финал ўйини 20 ноябрь куни бўлиб ўтади. Ғолиб жамоа вилоят чемпиони деган шарафга эга бўлиш билан бир қаторда Про-лига йўлланмаси учун Тошкентда ўтказиладиган ўтиш ўйинларида қатнашиш ҳуқуқини ҳам қўлга киритади.

Бўлажак ўйинда ёшлар жамоамизга омад ёр бўлишини тилаймиз.

“Навбаҳор” ПФК матбуот хизмати.     

Рейтинг:  0 / 5

Наманган футбол ассоциацияси президенти кубоги мусобақаси 17 ноябрь куни ўз якунига етди. Мазкур турнир икки босқичда ўтказилиб, мусобақанинг ҳал қилувчи босқичига “Навбаҳор”нинг U-21 ёшлар ва U-18 ҳамда Уйчининг “Пахтакор - 79” жамоалари йўл олди. Мусобақа даврали тизимда ўтказилди.         

Иккинчи босқичнинг дастлабки баҳсида Анвар Ҳафизов ва Денис Тойменцов мураббийлик қилаётган “Навбаҳор” – U-21 ёшлар ҳамда Уйчининг “Пахтакор-79” жамоалари ўзаро куч синашиб, унда ёш “лочинлар” 3:1 ҳисобида ғалаба қозонишганди.

Анвар Ҳафизов шогирдлари ушбу мусобақанинг иккинчи учрашувини Александ Лян ва Муҳаммаджон Нуриддинов қўл остидаги “Навбаҳор” – U-18 жамоасига қарши ўтказишди.

“Навбаҳор” ПФК қошидаги “Навбаҳор - Умид” болалар – ўсмирлар футбол мактаби майдонида кечган мазкур ўйин кескин курашлар остида ўтди.

Ушбу учрашувда тажриба ўз сўзини айтиб, “Навбаҳор” –  U-21 ёшлар жамоамиз 3:2 ҳисобида зафар қучди.

Ёш “лочинлар” иккинчи босқичдан жой олган ҳар икки баҳсда ғалаба қозонишгани боис, мазкур турнир доирасидаги  “Навбаҳор” – 18 - “Пахтакор - 79” жамоалари ўртасидаги ўйин ўтказилмайдиган бўлди ҳамда “Навбаҳор” – U-21 ёшлар жамоамиз муддатидан олдин ассоциация президенти кубогини қўлга киритди.

Биз ушбу муваффақият билан  ёшлар жамоамизни табриклаймиз ва кейинги ўйинларда ҳам ёш футболчиларимизга омад ёр бўлишини тилаб қоламиз.  

“Навбаҳор” ПФК матбуот хизмати.    

Рейтинг:  0 / 5

Dubay Cup -  2019 халқаро мусобақаси

БАА ОТЖ – Ўзбекистон ОТЖ – 2:1 (1:0)

Дубай. “Шабаб ал Аҳли” стадиони.

Голлар: Зайид ал Амири (6, пен.), Яҳё ал Ҳассани (59) - Ойбек Бозоров (90+1).

Ўзбекистон ОТЖ : 1.Абдувоҳид Неъматов, 2.Ислом Қобилов, 4.Абдулла Абдуллаев, 6.Азиз Ғаниев, 8.Нурилло Тўхтасинов, 9.Жасур Яхшибоев, 10.Бобир Абдихолиқов, 18.Ҳусниддин Алиқулов, 19.Илҳом Алижонов, 20.Шаҳбоз Жўрабеков, 22.Достон Ибрагимов. 

Захирадагилар: 21.Машҳур Муҳаммаджонов, 3.Шароф Муҳиддинов, 5.Дилшод Саитов, 7.Остон Ўрунов, 11.Миржаҳон Мираҳмадов,  13.Шерзод Насруллаев, 14.Аброр Исмоилов, 15.Ойбек Рустамов, 16.Азиз Амонов, 17.Ислом Рашидхонов, 23.Ойбек Бозоров, 31.Иброҳим Йўлдошев.

 БААнинг Дубай шаҳрида 23 ёшгача бўлган терма жамоалар ўртасидаги халқаро мусобақада иштирок этаётган сербиялик мутахассис Любинко Друлович бошчилигидаги Ўзбекистон олимия терма жамоаси мазкур турнир доирасидаги 3-баҳсни 17 ноябрь куни мусобақа мезбони БАА термасига қарши ўтказиб, 1:2 ҳисобида мағлубиятга учради.

Олимпиячиларимизнинг ягона голига учрашувнинг ҳакам томонидан қўшиб берилган  вақтида Ойбек Бозоров муаллифлик қилди.

Ушбу ўйинда “Навбаҳор” ҳимоячиси Илҳомжон Алижонов бошланғич таркибда майдонга тушди.

Эслатиб ўтамиз, Любинко Друлович шогирдлари ушбу турнир доирасидаги олдинги баҳсларда Ироқ (3:3) ва Иордания (1:1) термалари билан куч синашиб, дуранг натижани қайд этишганди.

Вакилларимиз мазкур мусобақа доирасидаги сўнгги учрашувни 19 ноябрь куни Саудия Арабистони олимпия терма жамоасига қарши ўтказишади.   Бўлажак ўйинда олимпиячиларимизга омад ёр бўлишини тилаймиз.

“Навбаҳор” ПФК матбуот хизмати.