Рейтинг:  0 / 5

Coca Cola Суперлига 25-туридан ўрин олган “Навбаҳор” – “Локомотив” жамоалари ўртасидаги учрашувнинг танаффус пайтида шу ойда Олмалиқ шаҳрида ўтказилган аёллар футболи бўйича ПФЛ кубоги мусобақасида ғолибликни қўлга киритиб, кубок соҳибига айланган Карима Юлдашева мураббийлик қилаётган “Навбаҳор” аёллар жамоаси, шунингдек, Ўзбекистон футбол ассоциацияси ҳузуридаги ҳудудий футбол академияларининг 2003 йилда туғилган тарбияланувчилари ўртасида октябрь ойида Тошкентда бўлиб ўтган Ўзбекистон чемпионатида ғолибликни қўлга киритган Ғанишер Исмоилов директорлик қилаётган Наманган вилоят болалар – ўсмирлар футбол академиясининг Аъзам Рўзиев ва Шавкат Жалилов мураббийлигидаги жамоа аъзоларини тақдирлаш маросими ўтказилди.

Унда Наманган шаҳар ҳокими, “Навбаҳор” ПФК президенти Шавкат Шокиржанович Абдураззоқов, Наманган вилоят Маданият ва спорт ишлари бошқармаси бошлиғи Шокир Аҳмедович Қорабаев, Наманган вилоят футбол ассоциацияси 1-вице-президенти Шуҳрат Мираҳмадшаевич Мирхолдиршоев, “Навбаҳор” ПФК вице-президенти Ойбек Арифович Саматов иштирок этишди.

“Навбаҳор” аёллар футбол жамоаси футболчиларига “Навбаҳор” ПФК раҳбарияти томонидан ажратилган қимматбаҳо телевизорлар, 2003 йилда туғилган тарбияланувчилардан иборат вилоят футбол академияси жамоаси аъзоларига эса “Навбаҳор” ПФК раҳбарияти томонидан клуб логотипи туширилган эсдалик совғалари топширилди.

Шу тариқа, ғолиблар муносиб тақдирланишди.

“Навбаҳор” ПФК матбуот хизмати.

Рейтинг:  5 / 5

Coca Cola Суперлига 25-тур доирасидан ўрин олган “Навбаҳор” – “Локомотив” жамоалари ўртасидаги учрашувдан кейинги матбуот анжуманининг биринчи қисмида “Локомотив” бош мураббийи Самвел Бабаян иштирок этиб, журналистларнинг саволларига жавоб берди.

- Бугунги баҳс борасида тўхталадиган бўлсам, учрашув завқ бағишлади, биз бугун жуда сифатли ўйин намойиш этдик. Аммо юзага келган кўплаб қулай имкониятлардан фойдалана олмадик.

Лекин жамоамиз ўйиндан -  ўйинга ўзида ишонч ҳосил қилмоқда ва йигитлар бир-бирларини яхши тушунишмоқда. Шунга асосланиб, шуни таъкидлашим лозимки, “Локомотив”да барча бир мақсад йўлида бирлашган, бу эса барча нарсада намоён бўлмоқда.   

Ўз йигитларим билан фаҳрланаман ва уларга бугунги ўйин учун ўз миннатдорчилигимни билдираман.

-  Охирги иккита ўйиндан буён Сардор Мирзаев ҳужумда ўйнаяпти. Шу ҳақда ҳам тўхталиб ўтсангиз...

- Таъкидлаш жоизки, Сардор хужумда жуда сифатли ўйин кўрсата олади ва у ҳар бир позицияда ўйнаб кета олишга қодир футболчи. Биз бугун ҳаммасини пухта ўйлаб, вариантларни уйғунлаштириб, шу қарорга келдик. Сардор  ҳужум чизиғига мос ўйинчи. Мирзаев ўтган баҳсда ҳам гол урганди. Бугунги ўйинда ҳам Сардорда яхши вазиятлар бўлди ва кўплаб ҳолатларда жамоага ёрдам берди. Шунингдек, ғалаба тўпини киритди.  

    Яна бир марта шуни таъкидламоқчиманки, Сардор ҳужум чизиғи учун керакли футболчи.

- Бугунги рақибингиз “Навбаҳор”нинг ўйини ҳақидаги фикрларингиз?   Наманганликлардан шундай ўйинни кутган эдингизми?

      -   Албатта биз “Навбаҳор”нинг ўйинларини яхшилаб ўрганиб чиқдик ва тўпни кўпроқ ўз назоратимиз остига олишимиз кераклигини билардик ҳамда бунга эриша олдик.

   “Навбаҳор”нинг кучли тарафларини ҳам ўргандик ва жамоанинг чап тарафдан кўпроқ ҳужум уюштиришини билиб, шунга яраша тайёргарлик кўргандик. Азизбек Турғунбоев ва Мирзоҳид  Ғофуровларнинг чап тарафдан қочиб кетишининг олдини олдик. Мен кўпроқ ўзимизнинг жамоамиз ҳақида гапиришни истардим.         

Мазкур учрашувгача кўплаб ўйинларда дурангга эришдик. Бунга эса бутун учрашув давомида йигитларнинг бир хил темпда ўйнай олишмагани, 5-10 дақиқалик бўшашиш оқибатида тўп ўтказиб юборишлари сабаб бўлди.  
     Анзур Исмоилов ва Ислом Тўхтахўжаев каби ҳимоячиларга жамоамизда ўринбосарлар борми? Ҳозирги кунда улар “Локомотив”нинг тўлақонли аъзолари ва айни пайтда уларни алмаштиришга эҳтиёж йўқ. Уларнинг яна бир неча йил давомида футбол ўйнашларини истардим.

Албатта жамоамизда ёш ҳимоячилар бор. Бундан ташқари, қишда селекция ишлари ҳам жадал давом этади.
Ҳар бир инсоннинг ўз орзуси бўлади. 1996 йилда “Навбаҳор” чемпион бўлганида шу клубда фаолият юритардим. Энг катта орзуларимдан бири бир кун келиб, “Навбаҳор” бош мураббийи сифатида жамоани Ўзбекистон чемпиони қилиш.

-  2020 йилги мавсумга қандай режаларингиз бор?

-  Кучли ва рақобатбардош жамоани шакллантириш,  яхши натижаларга   эришиш ва йигитларни ғолиблик руҳида тарбиялаш.

   “Навбаҳор” ПФК матбуот хизмати.

Рейтинг:  4 / 5

Coca Cola Суперлига 25-тур доирасидан ўрин олган “Навбаҳор” – “Локомотив” жамоалари ўртасидаги учрашувдан кейинги матбуот анжуманининг иккинчи қисмида “Навбаҳор” бош мураббийи Андрей Канчельскис иштирок этиб, ОАВ ходимларининг саволларига жавоб берди.

- Аввало “Локомотив”ни бугунги ғалаба билан табриклайман. Бугун майдонда бир-бирига муносиб рақиблар тўп сурди ва бундай жамоага қарши ўйнаш ёқимли. Йигитлар биринчи бўлимда юзага келган вазиятлардан фойдаланишганида, жамоамиз ҳисобда олдинга чиқиб олган ҳамда ўйин суръати бошқача кечган бўларди. Аммо ҳар бир футболчининг индивидуал хусусияти турлича. Маҳорат меҳмонларда бироз устунлик қилди.

    Иккинчи бўлимда ҳам шогирдларимда ҳисобни тенглаштириш  учун имконият юзага келди. Лекин ундан ҳам самарали тарзда фойдалана олишмади.

    Умуман олганда, жамоамизда 2та индивидуал яққол голга тортадиган вазият юзага келганди. Аммо ушбу ўйинда маҳорат асосий планга чиқди.

    Шундай бўлса-да, йигитларга ўз миннатдорчилигимни билдираман. Улар майдонда қўлдан келганича, барча имкониятларни ишга солган ҳолда, ҳаракат қилишди. Аммо бу – футбол ва унда ўйлаган режанг доимо амалга ошавермайди.

     Шунингдек, шундай совуқ ҳавода “Навбаҳор”ни қўллаб- қувватлаш учун стадионга келган мухлисларга ҳам ўз миннатдорчилигимни билдираман.

-     Сўнгги турлар тақвимининг тиғиз келиши ҳам жамоангизнинг ўйинларига ўз таъсирини ўтказяптими?

-   Икки ойдан кўпроқ вақт давомида деярли майдонга тушмадик ва энди мавсум сўнггида бир ҳафта давомида 3та ўйин ўтказамиз.

    Умид қиламанки, келаси йили бошқача регламент ва ўзгача тақвим бўлади ҳамда у жамоалар учун ҳам анча қулай бўлади.

    Бир ҳафта оралиғидаги парвозлар, сафарлар ҳам ўйинларга ўз таъсини ўтказади, албатта. Тўғри, айрим жамоалар жорий мавсумда ўз олдига қўйилган вазифани деярли ҳал қилиб бўлди ва бундай клублар учун очко аҳамиятсиз. Лекин турнир жадвалининг қуйи қисмида бораётган жамоаларга очко жуда зарур ҳамда улар охиригача кураш олиб боришади.

     Чиройли ва яхши ўйин намойиш этиш учун таркибда маҳоратчи футболчилар бўлиши, захира ўриндиғи узун бўлиши лозим. Шундагина мухлислар жозибали ўйин ггувоҳига айланишади. Ахир футбол мухлислар учун ўйналади-ку!

   Ушбу омиллар ҳам эътиборга олинса, яхши бўларди. Аммо ҳамма нарсани борча қабул қиламиз. Олдимизда яна битта, яъни сафарда “Қўқон-1912” жамоасига қарши кечадиган ўйин бор ва ўша баҳсни муносиб ўтказиб, кейин келаси мавсумга тайёргарликни бошлаймиз.

-     Келаси мавсумда камида бронза медали учун кураш олиб боришга қодир бўлган таркибни шакллантира оласизми? Бунга сизда ишонч борми?

      -   Албатта ҳар бир мураббийда ишонч бўлиши керак. Жорий мавсум арафасида ҳам айрим маҳоратли футболчиларни жамоага жалб этгандик. Лекин айрим сабабларга кўра, улар билан шартнома имзолай олмагандик.  Айни пайтда келаси мавсум учун бир қатор ўйинчиларни кўз остимизга олганмиз ва улар билан музокара олиб борилмоқда. Таркибимиз маҳоратли футболчилар билан тўлдирилса, кучли учликдан жой олиш учун кураш олишга ҳаракат қиламиз.

     Ўз навбатида сизга шуни таъкидламоқчиманки, биз музокара олиб  бораётган барча футболчилар ўз жамоасининг асосий таркиб ўйинчилари ҳисобланишади.

    Кўз остимизга олинган ўйинчилар билан музокаралар ижобий якун топгудек бўлса, анча рақобатбардош жамоа шаклланади ва шунга умид қиламан.

     “Навбаҳор” ПФК матбуот хизмати.  

Рейтинг:  0 / 5

Coca Cola Cуперлига, 25-тур

“Навбаҳор” – “Локомотив” – 0:1 (0:0)

Наманган шаҳри. “Марказий” ўйингоҳ. 5435 томошабин.

Ҳакамлар: Темур Тўхтасинов, Анвар Маражабов, Зиёдулла Абдураҳмонов, Акмал Раҳимов.

Назоратчи: Султон Зайлобиддинов.

Комиссар: Шерзод Ражабов.

Гол: С.Мирзаев (59).  

“Навбаҳор”: 1.Ўткир Юсупов, 4. Азиз Ибрагимов, 8.Шаҳзод Шайманов (34.Комилжон Тожиддинов, 63), 9.Иван Соловьёв, 10.Азизбек Турғунбоев, 15.Обид Жўрабоев, 19.Мирзоҳид Ғофуров, 22.Игорь Голбан, 55.Ғиёсжон Комилов, 70.Аббосжон Ғуломов (96. Илҳомжон Алибоев, 75), 99.Амирбек Жўрабоев (95. Нодир Мавлонов, 56).

“Локомотив”: 1.Игнатий Нестеров, 5.Анзур Исмоилов, 6.Остон Ўрунов, 8.Жамшид Искандеров, 10.Сардор Мирзаев, 20.Ислом Тўхтахўжаев,

23.Йован Жокич, 24.Даврон Ҳошимов, 33.Олег Зотеев, 71.Арсланмурат Аманов (18.Иброҳим Ғанихонов,77), 77.Диёржон Туропов (4.Шерзод Каримов, 86). 

Сoca Cola Суперлига 25-туридан ўрин олган баҳсда жамоамиз ўз майдонида Тошкентнинг “Локомотив” клубини қабул қилди.

Мазкур учрашув “Навбаҳор”нинг жорий мавсумдаги Намангандаги сўнгги ўйини бўлганлиги боис, унинг кескин курашлар остида кечиши кутилганди ва олдинроққа ўтиб, таъкидлаш жоизки, амалда ҳам шундай бўлди.

Ушбу учрашувда сариқ карточкалари тўрттага етганлиги боис, жамоамиз тўпурари Александр Касьян майдонга туша олмади ҳамда унинг ўрнида номинал ҳужумчи сифатида тажрибали футболчи Азиз Ибрагимов майдонда ҳаракат қилди.                     

Ўйин илк дақиқаларданоқ кескин тус олиб, гоҳ у, гоҳ бу жамоа дарвозаси олдида хавфли вазиятлар юзага кела бошлади.

Мезбонларнинг биринчи бўлимда содир этган ҳужумларига тўхталадиган бўлсак, бир вазиятда Азиз Ибрагимовнинг яқин масофадан дарвозага йўллаган зарбасини ҳимоячи Анзур Исмоилов бартараф этиб, тўпни қайтарди.

Яна бир ҳолатда эса бурчак зарбасидан сўнг, Обид Жўрабоев тўпни боши билан дарвозага йўллади. Аммо “Локомотив”нинг тажрибали дарвозабони Игнатий Нестеров ушбу зарбани ажойиб сэйвни амалга ошириб, бартараф этишга муваффақ бўлди.

Шунингдек, ярим ҳимоячи Шаҳзод Шаймановда танаффусгача 2та қулай имконият юзага келди. Унинг дарвозага боши билан йўллаган биринчи зарбасидан сўнг, Игнатий Нестеров тўпни қийинчилик билан қайтариб, майдон ташқарисига чиқариб юборган бўлса, иккинчи зарбасидан сўнг, Нестеров тўпни қўлидан чиқариб юбориб, кейин ушлаб олди.  

Шунингдек, бирини бўлим давомида маҳоратли ярим ҳимоячи Азизбек Турғунбоевнинг жарима ва дарвоза томон йўллаган зарбаларига аниқлик етишмаган бўлса, ҳужумларнинг бирида тажрибали ҳимоячи Мирзоҳид Ғофуровнинг зарбаси йўлига жамоамизнинг собиқ футболчиси Даврон Ҳошимов тўғаноқ бўлди. 

 Танаффусгача меҳмонларда ҳам бир қатор вазиятлар юзага келди. Жумладан, шу куни майдонда фаол ҳаракат қилган “Навбаҳор”нинг яна собиқ футболчиси Остон Ўруновнинг ўзи 3та қулай имкониятга эга бўлди.

Унинг дастлабки зарбасини жамоамиз дарвозабони Ўткир Юсупов ажойиб сэйв намойиш этиб, бартараф этган бўлса, яна бир вазиятда Ўткир тўпни жамоадошларига оширмоқчи бўлиб, хатога йўл қўйди ва копток кутилмаганда Остонга келиб тушди. Унинг дарвоза томон йўллаган кучли зарбасидан сўнг, бу сафар ҳам Юсупов ўз маҳоратини намойиш этиб,  тўпни қайтаришга муваффақ бўлди.

Ўруновнинг учинчи зарбасидан кейин эса тўп дарвоза тўсинига тегиб қайтди.

Шунингдек, бир сафар Жамшид Искандеровнинг кучли зарбасидан кейин тўпни Ўткир Юсупов ушлаб олди.

Натижада биринчи бўлимда ҳисоб очилмади.

Ўйиннинг иккинчи 45 дақиқаси ҳам кескин курашларга бой бўлди.

Иккинчи бўлимни фаол тарзда бошлаган “темирйўлчилар” майдон эгалари дарвозаси олдида бирин-кетин хавфли вазиятларни вужудга келтира бошлашди.                     

Жумладан, бир вазиятда Остон Ўруновнинг ўнг қанотдан жарима майдончаси ичига оширган тўпини Сардор Мирзаев дарвозага йўлламоқчи бўлди. Аммо унинг зарбасидан кейин тўпни ҳимоячилар қайтаришди.

Тошкентликларнинг яна бир ҳужумларида эса Жамшид Искандеровнинг зарбасидан кейин, тўп дарвоза устунига тегиб қайтди.

Самвел Бабаян шогирдлари ниҳоят, 59-дақиқада стандарт вазиятдан самарали тарзда фойдаланиб, ҳисобни очишга муваффақ бўлишди. Туркманистонлик ярим ҳимоячи Арсланмурат Аманов томонидан амалга оширилган бурчак зарбасидан сўнг, Сардор Мирзаев тўпни боши билан дарвозага аниқ йўллади - 0:1.

Яна бир вазиятда эса “Локомотив”нинг тажрибали ҳимоячиси Олег Зотеев дарвозабон Ўткир Юсупов билан бирга – бир вазиятга чиқди. Хайриятки, сўнгги паллада унинг зарбасига аниқлик етишмади.  

80-дақиқада Андрей Канчельскис шогирдлари ҳисобни тенглаштириш учун қулай имкониятга эга бўлишди. Аммо Азиз Ибрагимовнинг кучли зарбасидан сўнг, меҳмонлар ҳимоячиси тўпни дарвоза чизиғи устидан қайтарди.

Натижада учрашув ҳисоби ўзгармай қолди ва “Навбаҳор” жорий мавсумнинг ўз майдонидаги сўнгги ўйинида мағлубиятни тан олишга мажбур бўлди.

Эътиборлиси, 2018 йилги чемпионатнинг Намангандаги охирги баҳсида ҳам ушбу клублар ўзаро куч синашишган ҳамда унда ҳам пойтахтликлар зафар қучишганди – 3:0 ҳисобида.

Ушбу ғалабадан сўнг, “Локомотив” кумуш медални нақд қилган бўлса, афсуски, “Навбаҳор” турнир жадвалида 2 поғона пастлаб, 9-ўринга тушиб кетди.

Учрашув якунланганидан сўнг, ҳар икки жамоа аъзолари майдонда саф тортишди ва Ўзбекистон Республикаси мадҳияси янграб, Coca Cola Суперлиганинг Намангандаги бу йилги ўйинлари якунланди.  

"Навбаҳор” ПФК матбуот хизмати.