Хабарингиз бор, Баҳром Норсафаров мураббийлик қилаётган Ўзбекистон аёллар терма жамоаси Aнталия шаҳрида ташкил этилган “Festival Women's Trophy 2021” халқаро турнирида қатнашди.
Aфрика чемпионлари ҳисобланган Экватор Гвинеяси (5:0) ва Нигерия (0:1) вакилларига қарши кечган баҳслардан сўнг, Баҳром Норсафаров шогирдлари Россиянинг икки карра чемпиони ЦСКА клубига қарши майдонга тушишди.
Emir Hotels спорт мажмуасида бўлиб ўтган бугунги баҳсда аёллар терма жамоамиз Нилуфар Қудратованинг 13-дақиқада урган голи эвазига 1:0 ҳисобида ғалаба қозонди.
Эслатиб ўтамиз, Ўзбекистон аёллар терма жамоаси таркибидан “Навбаҳор - Women” аёллар жамоасининг икки нафар вакили – ярим ҳимоячи Зуҳра Абдураҳимова ҳамда ҳужумчи Нилуфар Дадажонова ҳам ўрин олишган.
Анталиядаги халқаро мусобақада Баҳром Норсафаров шогирдлари 3 та ўйин ўтказиб, уларнинг иккитасида ғалаба қозониб, битта баҳсда имкониятни бой беришди.
Aёллар терма жамоамизнинг асосий мақсади, Осиё кубоги саралаш беллашувларига юқори даражада тайёргарлик кўриш ҳисобланади.
Шу сабабли, дунёнинг кучли жамоаларига қарши бир қатор халқаро учрашувларни ташкил этиш терма жамоамизнинг тайёргарлик режасидан ўрин олган.
“Навбаҳор” ПФК матбуот хизмати.