Янги мавсумга тайёргарликни пойтахтимиз Тошкентда олиб бораётган жамоамиз мазкур ўқув-машғулот йиғини доирасида бугун “Жар” стадионида биринчи лига вакили – Тошкентнинг “Рубин” жамоасига қарши ўртоқлик учрашуви ўтказди.

Мазкур ўйинда “Навбаҳор” таркибида қуйидаги футболчилар майдонга тушишди: Ислом Абдуллахонов, Шаҳзод Ҳамидов, Мирзоҳид Мирзамаҳмудов, Хушнуд Авилов, Игорь Голбан, Мирзоҳид Ғофуров, Улуғбек Акназаров, Шерзод Ғуломжонов, Иван Соловьёв, Азизбек Турғунбоев, Шоҳруҳ Маҳмудҳожиев.

Захирадан майдонга тушганлар: Ўткир Юсупов, Аббос Ғуломов, Азимжон Аҳмедов, Қувондиқ Рўзиев, Забиҳилло Ўринбоев, Марко Путинканин, Никола Тасич, Баҳром Абдураҳимов, Сардор Теляков, Ислом Исоқжонов, Илҳом Алибоев, Фарҳод Мираҳматов.

Ушбу учрашувда тўлиқ устунликка эга бўлган Нўъмон Ҳасанов шогирдлари йирик – 6:0 ҳисобида ғалаба қозонишди.

Таъкидлаш жоизки, “лочинлар” 1-бўлимдаёқ 4 та гол уриб, учрашув тақдирини ҳал қилиб қўйишганди.

Голларга Шерзод Ғуломжонов, Азиз Турғунбоев ( 2 та), Мирзоҳид Ғофуров, Азимжон Аҳмедов (пенальтидан) ва Забиҳилло Ўринбоевлар муаллифлик қилишди.

Айтиш лозимки, мазкур ўйинни  мураббий Азамат Абдураимов ҳамда Ўзбекистон – U-19 ёшлар терма жамоаси бош мураббийи Темур Кападзе ҳам бевосита стадионда кузатишди.  

“Навбаҳор” ПФК матбуот хизмати.