20 май куни Ўзбекистон футбол ассоциацияси Биринчи вице-президенти Умид Аҳмаджонов Суперлигада қатнашаётган клублар директорлари, бош мураббийлари ва ҳакамлар билан йиғилиш ўтказди.
Унда “Навбаҳор” ПФК директори Бахтиёр Бобоев ҳамда жамоамиз бош мураббийи Андрей Канчельскис ҳам иштирок этишди.
Йиғилиш давомида сўнгги пайтларда Ўзбекистон футбол ассоциацияси томонидан мамлакатимиздаги ҳакамлар савиясини ошириш, ёш ҳакамларни тайёрлаш борасида кўплаб чора-тадбирлар амалга оширилаётгани таъкидланди. Шунга қарамай, ҳакамлар томонидан қабул қилинаётган баъзи қарорлар борасида кўплаб баҳс-мунозаралар юзага келаётгани, бунинг натижасида ҳакамларга нисбатан нотўғри фикр шаклланиб қолаётгани таъкидланди. Атайлаб қўпол хатоларга йўл қўядиган, турли қинғир ишларга аралашиб юрадиган ҳакамлар қатъий жазоланиши яна бир бор огоҳлантирилди.
Шу билан бирга ҳакамлар баъзан инсонийлик омили туфайли хатоларга йўл қўйишлари кузатилаётгани айтиб ўтилди. Бундай ҳолатларда клублар бош мураббийлари учрашув пайтида ўз ҳиссиётларини жиловлаб, ҳакамларга нисбатан ҳақоратомуз ибораларни ишлатишдан тийилишлари кераклиги таъкидланди. ЎФА экспертлар гуруҳи томонидан ҳар бир ҳакамнинг ҳаракатлари кузатиб, таҳлил қилиб борилади. Ўйин натижасига таъсир этувчи қўпол хатоларга йўл қўйганлар тегишли тартибда жазоланади. Шу билан бирга баъзи қарорлар ўйин вақтида мухлисларга шубҳали туюлса-да, мутахассислар гуруҳи томонидан ўрганиб чиқилганидан кейин ўша вазиятда ҳакамлар тўғри қарор қабул қилгани ойдинлашган вазиятлар ҳам бўлаётгани таъкидланди.
Шулардан келиб чиқиб, клублар бош мураббийлари ва мутасаддилари доимо ЎФА ва ПФЛ раҳбарияти билан ўзаро алоқада бўлиб, хато ҳамда камчиликларни биргаликда бартараф этиб боришлари таклиф қилинди.
Манба:ufa.uz.